मकैको बीउमा आत्मनिर्भर

गुल्मी,फागुन १५– गुल्मी जिल्ला मकैको बीउमा आत्मनिर्भर भएको छ । जिल्ला कृषि विकास कार्यालय गुल्मीका अनुसार जिल्लामा ४० टन बढी बीउ उत्पादन गरेको छ । जिल्लामा १८ लाख ४० हजारको मकैको बीउको कारोबार हुने कार्यालयका वरिष्ठ कृषि विकास अधिकृत चेतनाथ अधिकारीले बताए । “४० टनमध्ये १५ टन जिल्लाकै बृहत्तर मकैबाली उत्पादन कार्यक्रमका लागि प्रयोग हुन्छ, उनले भने , ‘८ देखि १० टन अर्घाखाँची र बाँकी १५ टन किसानले आफैँ परम्परागत किसानलाई बिक्री वितरण गर्ने गर्छन् ।” अघिल्लो वर्ष जाजरकोट, सुर्खेत, दैलेमा पाँच टन मकैको बीउ पठाएको उनले बताए ।

यसवर्ष भने विगतको तुलनामा २५ प्रतिशत मकैको बीउ उत्पादन बढ्ने उहाँको भनाइ छ । गुल्मीमा रेसुङ्गा २, गुल्मी २, मनकामना ३, देउती, रामपुर कम्पोजिट, अरूण २, मनकामना १, मनकामना ६ गरी आठ जातका मकैको बीउ उत्पादन भइरहेको छ । त्यसमध्ये रेसुङ्गा २ र गुल्मी २ गुल्मीमै विकास भएका मकै बीउका जात हुन् । जिल्लामा अत्यन्तै सफल रहेका यी जात जिल्ला कृषि विकास कार्यालयले यसलाई सिफारिस गरे पनि कृषि अनुसन्धान केन्द्रबाट भने प्रमाणित हुन बाँकी रहेको कृषि विकास कार्यालयले जनाएको छ । “जिल्लामै विकास भएका रेसुङ्गा २ र गुल्मी २ एकदम राम्रो उत्पादन दिएकाले हामीले सिफारिस गरिसकेका छाँै तर कृषि अनुसन्धान केन्द्रबाट सिफारिस हुन बाँकी छ, वरिष्ठ कृषि विकास अधिकृत अधिकारीले भने, सिमीचौर, दरबारदेवीस्थान, बम्घा, अर्खले, हस्तीचौर, पुर्कोट र भनभने गाविसमा मकैको बीउ उत्पादन हुन्छ ।” जिल्लामा सरोकारवालाहरूको बैठकले बीउ मकैको मूल्य तोकी तोकिएको मूल्यमा कृषि विकास कार्यालयले खरिद गर्ने र २५ प्रतिशत छुटमा किसानलाई उपलब्ध गराउने गरेको उनको भनाइ छ ।

रु ४० प्रतिकिलो जिल्लाको दर रहेकामा यसरी २५ प्रतिशत अनुदानमा उपलब्ध गराउँदा ३४ रुपैयाँ ५० पैसा कृषि कार्यालयले अनुदान दिने र किसानलाई जम्मा प्रतिकिलो ११ रुपैयाँ ५० पैसा पर्ने उहाँले जानकारी दिए ।