खोरेत रोगबाट दर्जनौँ पशुको मृत्यु

चौतारा, ९ फागुन  । सिन्धुपाल्चोकको भोटसिपा गाविसमा एक महिनादेखि फैलिएको खोरेत  रोगबाट हालसम्म  दर्जनौँ पशु मरेपछि करिब रु १० लाखको क्षति भएको छ । माघको दोस्रो साताबाट भोटसिपा–८ मा देखा परेको सो रोग वडा नं ६, ७ र ९ मा समेत फैलिँदै गइ हालसम्म नियन्त्रणमा  नआएपछि करिब एकसय चौपाया मरिसकेको स्थानीय राजेन्द्र आचार्यले जानकारी दिनुभयो । सुरुमा वडा नं ८ को डाँडागाउँमा सुङ्गुरमा भ्याकुते रोगबाट १३ चौपाया मरेको र त्यसको नियन्त्रण नहँुदै गाइभैंसी र बाख्रासमेतमा खोरेत रोग देखा परी हाल गाविस भरी फैलिएको आचार्यले बताउनुभयो । सुरुमा ज्वरो आउने, झोक्राएर केही नखाने, जिब्रो सुन्निएर ¥याल काड्ने र खुर पाक्ने लक्ष्ण देखा परेको २४  घण्टाभित्र मर्ने र दैनिक तीन÷चारवटासम्म मरेको स्थानीयले बताएका छन् । रोग लागेको जानकारी पाएपछि सो गाविसमा तीन पटक औषधि र दुई पटक टोलीसमेत पठाउँदा पनि नियन्त्रणमा आइनसकेकाले भोलि विशेषज्ञ टोली नै पठाइने जिल्ला पशु सेवा कार्यालयका  अर्जुन तिमिल्सिनाले बताउनुभयो ।  -कृषि साप्ताहिक