लुम्बिनी (रुपन्देही), ११ असोज । रुपन्देहीले पछिल्लो समय कृषि क्षेत्रमा फड्को मारेको छ । जिल्लाका किसान व्यावसायिक कृषि पेसाप्रति आकर्षित हुन थालेसँगै रूपन्देहीले कषिमा फड्को मारेको हो । अहिलेसम्म जिल्ला मुख्य खाद्य बाली धान, गहुँ, तरकारी, माछा र दूधमा आत्मनिर्भर भएको छ । जिल्ला कृषि विकास कार्यालयका प्रमुख कृष्णभद्र अधिकारीले कार्यालयले किसानलाई विभिन्न प्रकारका तालिम, बीउबिजनमा अनुदान (७५ प्रतिशतसम्म), कृषि सामग्री वितरण मललगायतका सामग्री वितरण गरेसँगै विभिन्न कृषि उत्पादन वृद्धि भएको बताए ।
आगामी वर्षदेखि जिल्ला तोरी/सनफ्लावर, च्याउ र महमा पनि आत्मनिर्भर हुने उनको भनाइ थियो । जिल्लामा ७० हजार हेक्टर क्षेत्रफलमा धान खेती गरिँदै आएको छ । जसमा तीन लाख १५ हजार हेक्टर धान उत्पादन हुन्छ भने ५० प्रतिशत जिल्लामा खपत हुने गरेको छ । सरकारले यसै आवको बजेटमा रुपन्देहीसहित तराईका १२ जिल्लालाई धान उत्पादनको पकेट क्षेत्रसमेत घोषणा गरेको छ । कार्यालयले आगामी वर्षदेखि जिल्लामा बृहत्तर धान उत्पादन कार्यक्रम लागू हुने जानकारी दिएको छ ।
जिल्लाको ३० हजार पाँच सय हेक्टर क्षेत्रफलमा गहुँखेती गरिँदै आएको छ । कार्यालयका सूचना अधिकृत नवीन भण्डारीका अनुसार यहाँ एक लाख पाँच हजार मेट्रिक टनभन्दा बढी गहुँ उत्पादन हुने गरेको छ । जिल्लामा यस आवमा चार हजार मेट्रिक टन माछा उत्पादन भएको थियो । कार्यालयका मत्स्य विकास अधिकृत रमेश जैसवालका अनुसार आव २०७१/७२ असार मसान्तसम्म तीन हजार ७८० माछा पोखरीबाट वार्षिक चार हजार २०५ मेट्रिक टन माछा उत्पादन भएका हुन् । गत आवमा तीन हजार ५४७ मेट्रिक टन माछा उत्पादन गरिएका थिए । “यस वर्ष हामी आत्मनिर्भर भएका छौँ आगामी वर्षदेखि निर्यात गर्नेछौँ” उनले भने । कार्यालयले माछाखेतीमा किसानलाई प्रोत्साहन गर्न तीन लाख माछाका भूरा ५० प्रतिशत अनुदानमा वितरण, त्यस्तै एक लाख ५० हजार निःशुल्क भुरा वितरण, चुना, प्लेट मेसिन, टेरियटर मेसिनलगायतका सामग्री खरिदमा ५० प्रतिशत अनुदान दिने जैसवालले जानकारी दिए । जिल्लामा दूध उत्पादनमा वृद्धि हुँदै गएको छ । कार्यालयका अनुसार एक वर्षमा एक लाख ३० हजार ५७५ मेट्रिक टन दूध उत्पादन हुन्छ जसमध्ये ५० हजार मेट्रिक टन अन्य जिल्लामा जान्छ ।
कार्यालयका प्रमुख गान्धीराज उपाध्यायका अनुसार जिल्लामा प्रत्येक वर्ष सरदर दुई प्रतिशतका दरले दूध उत्पादनमा वृद्धि हुँदै गएको छ । जिल्लामा एक लाख ३१ हजार ७१४ दूधालु गाई/भैँसी छन् । कार्यालयले किसानका लागि विभिन्न जातका घाँसको बीउ वितरण, गाईको नश्ल सुधार, गोठ सुधार, डेरी सुदृढीकरण कार्यक्रम सञ्चालन गर्दै आएको छ । जिल्लामा कृषि क्षेत्रमा भन्दा किसानको आकर्षण पशु पालनमा बढ्दै गएको छ ।
Add Comment