मकैको घोगामा दाना नलाग्दा किसान मारमा

Mar 6 • समाचार

वीरगञ्ज, २२ फागुन । भारतको हैदरावादबाट आयात गरिएको बीउ लगाउँदा मकैको घोगामा दाना नलागेपछि बाराका किसान मारमा परेका छन् ।
निजगढ नगरपालिकाको रतनपुरी र कृषि भवनटोल, कोहलवी नगरपालिकाको नयाँबस्ती र आसामटोल, जितपुुर सिमरा उपमहानगरपालिकाको रामनगर, जैतापुर र डुमरवाना, सिम्रौनगढ नगरपालिकाको बेवापुर, कोर्चोवा र भगवानपुर तथा पचरौता नगरपालिकाको कुडवा र बाजुपट्टिका किसान मारमा परेका छन् ।
यस्तै, आदर्शनगर कोतवाल गाउँपालिकाको चिउटाहा र कोतवाली, बारागढी गाउँपालिकाको पथरा, पिपरा, वसन्तपुर र खोपवा, करैयामाई गाउँपालिकाको करैया, इटहर, बिल्हीलगायत गाउँका किसानले लगाएको करिब दुई हजार हेक्टर क्षेत्रफलमा लगाएको मकैको घोगामा दाना नलाग्दा किसानले करोडौँ रूपैयाँ घाटा व्यहोर्नुपरेको जिल्ला कषि विकास कार्यालयका कृषि विकास अधिकृत शिवरत्न साहले जानकारी दिएका छन् ।
“घोगा लागे पनि दाना नलाग्ने कारणबारे अनुसन्धान भइरहेको छ,” उनले भने । जिल्लामा किसानले चार हजार ६३५ हेक्टरमा हिउँदे मकैबाली लगाएका छन् भने त्यसमध्ये दुई हजार हेक्टरमा रहेको मकैको घोगामा दाना नलाग्दा किसानलाई रु दुई करोडभन्दा बढीको घाटा भएको कार्यालयले जनाएको छ ।
सरकारबाट सूचीकृत भएका ड्रागन, बन्नी, श्रेष्ठा, यनएम एच १२४७, ७३१, ७१३ लगायत जातका मकैको घोगामा दाना नलागेको कार्यालयले जनाएको छ । भारतको हैदरावादस्थित निजी बीज उत्पादन कम्पनीबाट नेपाल आयात गरिएका बीउ कलैयास्थित अरविन्द एग्रो सेन्टरले, ड्रागन बन्नी र श्रेष्ठा जातका मकैको बीउ स्थानीय एग्रोभेटले किसानलाई बिक्री गर्ने गरेको पाइएको छ ।

Related Posts

Leave a Reply

Your email address will not be published. Required fields are marked *

« »

सूचना विभाग दर्ता नं : २६९/०७३–७४
प्रकाशक : हब ब्रोडकास्टिङ्ग प्रालि, अनामनगर काठमाडौं
सञ्चालक : हिमा पौडेल
सम्पादक : वैकुण्ठ भण्डारी
सर्वाधिकार : हब ब्रोडकास्टिङ्ग प्राालि