तनहँ। पढेलेखेका युवा के गर्लान् ? त्यो सहजै भन्न सकिन्छ कि जागिर खोज्छन्, कि त विदेश ताक्छन् ।तनहुँ भानु नगरपालिका–१२ घले छापका कुशल चन्द्र अधिकारी भने कृषि पेसा रोजेका छन् । त्रिभुवन विश्वविद्यालयबाट कला सङ्कायमा समाजशास्त्र विषयमा स्नातकोत्तर पुरा गरी सोमबार दीक्षित भएका अधिकारीले पाँच वर्ष अघि देखि नै व्यावसायिक कृषि पेसा अङ्गालेका हुन् ।
परम्परागत शैलीलाई आधुनिकतामा परिवर्तन गर्दै अधिकारीले दुई सय रोपनी क्षेत्रफलमा दुई करोड रुपियाँ लगानी गरेर मिलुङ बहुउद्देश्यीय फार्म प्रालि सञ्चालन गरेका छन् । अधिकारीले व्यावसायिक रूपमा गाई, भैँसी, बाख्रा, कुखुरा, कालिज तथा मौरी पालन गरेका छन् । गाउँको खेतबारी बाँझो राखेर विदेश जान उपयुक्त नहुने देखेर कृषि पेसा अङ्गालेको अधिकारीले बताए । अधिकारीले १४ वटा दुहुना मुर्रा भैँसी, एक राँगो, १६ वटा पाडा पाडी, ६ वटा जर्सी गाई, ५० वटा बोयर बाख्रा, २५ घार मौरी पालेको र सबै व्यवसायबाट गरी मासिक एक लाख देखि एक लाख २० हजार मुनाफा हुने गरेको अधिकारीले जानकारी दिए । स्थानीय छ जनालाई प्रत्यक्ष रोजगारी दिएको उनले जानकारी दिए । स्थानीय कुखुरा, कालिज र माछा पालन समेत अधिकारीले गरेका छन् ।
अधिकारीको फाममा तीन वटा माछा पोखरी पनि छ । कृषिमा लागेर आफू निकै खुसी भएको बताउछन् अधिकारी । आफ्नो प्रेरणाको श्रोत बुबा राजेन्द्र अधिकारी क्षेत्री भएको उनले बताए । बुबा २० वर्ष विदेश बसेर आएपछि विदेश जान भन्दा स्वदेशमै कर्म गर्नु पर्छ भनेर हौसला प्रदान गरेपछि कृषि पेसा अङ्गालेको अधिकारीले बताए । अधिकारीले भने ‘कृषि पेसामा लागेर म सन्तुष्टि छु, बुबाको साथ र सहयोग पाएको छु , विभिन्न पुरस्कार पाउँदा हौसला मिलेको छ ।’ सरकारले किसानमैत्री नीति बनाउन नसकेकोले कृषि पेसालाई व्यवसायिक रूपमा लान सङ्घर्ष गरिरहनु परेको अधिकारीले बताए ।
गाउँका सोझासाझा किसानले कागजपत्र मिलाउन नसक्ने हुँदा उनीहरूले लाभ लिन नसकेकोले दाना, चोकर, ढुवानीमा अनुदान दिने हो भने लाभान्वित हुने अधिकारीले सुझाव दिए। भैँसीको दूध प्रति लिटर एक सय २० रुपियाँ र गाईको एक सय रुपियाँमा र पनिर आठ सय रुपियाँ किलो बिक्री गर्ने गरेको अधिकारीले जानकारी दिए। विवाह, व्रतबन्ध तथा चाडपर्वमा पनिरको माग धेरै हुन थालेकोले उत्पादित दूधको आधा भाग पनिर बनाउने गरेको अधिकारीले बताए । दूध स्थानीय इन्द्रावती बजार र डुम्रे बजारबाट बिक्री भइरहेको बिक्रीको समस्या नभएको उनले जानकारी दिए ।
अधिकारीको सफलता दिनप्रतिदिन चुलिँदो छ । अधिकारीले थुप्रै पुरस्कार पाएका छन्। नेपालमै कृषिमा भविष्य खोज्ने अधिकारी नमुना कृषक बन्न सफल हुनु भएको छ । अधिकारीले गत असार १५ गते गण्डकी प्रदेशको कृषि तथा भूमि व्यवस्था मन्त्रालयबाट २० हजार नगद सहित प्रदेश उत्कृष्ट कृषक पाएका छन्। यस अघि उनले नेपाल सरकार युवा तथा खेलकुद मन्त्रालयबाट राष्ट्रिय युवा प्रतिभा सम्मान–२०७८ सम्मान पाएका थिए । । नेपाल कृषि प्रधान देश भए पनि अपेक्षित रूपमा अझै यो क्षेत्रमा शिक्षित युवाको सङ्ग्लनता नदेखिएको बेला अधिकारीले कृषि पेसा गरेर प्रेरणाको स्रोत बनेको भानु नगरपालिका–५ का निर्वतमान वडाध्यक्ष प्रकाश मल्ल टाईसन बताउनुहुन्छ । ७० रोपनी जमिन आफ्नो र बाँकी भाडामा गरी दुई सय रोपनी जमिनमा कृषि व्यवसाय गरेको अधिकारीले जानकारी दिए ।
Add Comment