बुधबार, भदौ १, २०७९

निरन्तर पानी पर्न थालेपछि धान रोपाइँ सुरु

काठमाडौँ । वर्षायाम सुरु भएसँगै निरन्तर पानी पर्न थालेपछि धान रोपाइँ सुरु भएको छ । त्रियुगा नगरपालिका क्षेत्रको जोगिदह, पोर्ताह, लक्ष्मीपुर, भुल्के, कौवाइजस्ता स्थानमा दैनिक वर्षा भएकाले समय अघिनै धान रोपाइँ सुरु गरिएकोे हो । निरन्तर वर्षा सुरु भएसँगै चौदण्डीगढी नगरपालिकाको सुन्दरपुर, देबधारसहित बेलका नगरपालिकाको तपेश्वरी क्षेत्रमासमेत समय अगाडि नै रोपाइँ सुरु भएको सम्बन्धित क्षेत्रका किसानले बताए ।

समय अगाडि नै धान रोपाइँ गरिएकामा त्रियुगा नगरपालिका– ३ भुल्केका एक किसान रामशरण चौधरले भने । धानको बीउ अगाडि नै राखेका थियौँ, निरन्तर वर्षा सुरु भएपछि यस पटक विगत वर्षको तुलनामा दश दिन अगाडि देखिनै रोपाइँ सुरु गरेका हौँ । किसान डम्बरबहादुर प्रधानका अनुसार अगाडि देखिनै वर्षा सुरु भएका कारण यस पटक एक हप्ता अगाडिदेखि नै रोपाइँ सुरु गरिएको छ ।

विगत वर्षमा असार २० गतेभन्दा पछाडि मात्र धान रोपाइँ सुरु गर्ने गरिएको यस क्षेत्रका किसानले यस पटक जेठदेखि नै निरन्तर वर्षा भएपछि असारको पहिलो हप्ताबाट नै रोपाइँ सुरु गरिएको किसानले बताए । जेठको दोस्रो हप्तादेखि नै वर्षा निरन्तर हुन थालेपछि सुख्खा लाग्ने हो की भन्ने डरले किसानले केही समय अगाडि नै वर्षाको मौका छोपेर रोपाइँ सुरु गर्न थालेको जोगदहका किसान पुल्कीत चौधरीले जानकारी दिए ।

वर्षा निरन्तर भएका कारण खेतको हरियो गद्री र मकै सबै हटाएर केही समय अगाडि नै जिल्लाभित्रका किसानले रोपाइँ गर्न थालेका हुन् । कृषि ज्ञानकेन्द्रका अनुसार जिल्लामा झण्डै १४ हजार ५ सय हेक्टर जमिनमा वर्षा याममा धानखेती हुँदै आएको छ । यस पटक समयमानै निरन्तर वर्षा भएको कारण झण्डै ९५ प्रतिशतभन्दा बढी धान रोपाइँ हुनसक्ने केन्द्रका प्रमुख महेश चौधरीले बताए ।

प्रकाशित मिति: सोमवार, असार १३, २०७९