बिहिबार, चैत्र १५, २०८०

सिक्टा सिँचाइको गुणस्तर माथि प्रश्न

बाँके, साउन । परीक्षणका क्रममा पटकपटक मूल नहर भत्किन थालेपछि सिक्टा सिँचाइ आयोजनाको गुणस्तर छानबिन गर्न माग गरिएको छ । परीक्षणका क्रममा दोस्रो पटक यही साउन ७ गते ढकेरी नजीकै नहर भत्किएपछि गुणस्तर छानबिन गर्न माग गरिएको हो । पटक पटक नहर भत्किन थालेपछि राप्तीसोनारी गाउँपालिकाले सिक्टा सिँचाइ आयोजनाको गुणस्तरमाथि प्रश्न उठाउँदै केन्द्र र प्रदेश सरकारसँग छानबिन गर्न माग गरेको छ ।
परीक्षणका क्रममा पहिलो पटक २०७३ असार १४ गते सोही स्थानमा नहर भत्किएको थियो । गाउँपालिका अध्यक्ष लाहुराम थारुले राष्ट्रिय गौरवको यस आयोजनाको अवस्था नाजुक हुन पुगेको निष्कर्षसहित गाउँ कार्यपालिकाको बैंठकले नै गुणस्तर छानबिन गर्नुपर्ने निर्णय गरेको जानकारी दिए ।
वडा नं २ का वडाध्यक्ष मदन ओलीले सिक्टा सिँचाइ आयोजनाको गुणस्तरका कारण गाउँबस्तीमा जोखिम निम्त्याएकाले केन्द्र र प्रदेश सरकारले गुणस्तर जाँच गरी ठेकेदार कम्पनीलाई कारबाहीको दायरामा ल्याउन माग गरेका छन् ।
सरकारले विशेष प्राथमिकतामा राखेको आयोजनाले बाँकेको कृषि क्षेत्रलाई कायापलट गर्ने अपेक्षा राखिएको छ । तर, परीक्षणकै क्रममा पटक–पटक आयोजनाको मुल नहर भत्किन थालेपछि कामको गुणस्तरबारे चौतर्फी रुपमा प्रश्न उठिरहेको छ ।

प्रकाशित मिति: बिहिबार, साउन २४, २०७५