काठमाडौं । नेपाली कांग्रेसका नवनिर्वाचित महामन्त्री एवं वीपी पुत्र डा शशांक कोइरालाले आफ्ना बाबु प्रधानमन्त्री भएका बेला मुलुकको कुल बजेटको २७ प्रतिशत बजेट कृषिका लागि छुट्याएको बताएका छन् । नेपाली कांग्रेस निकट नेपाल पशु स्वास्थ्य सेवा प्राविधिक संघको पहिलो राष्ट्रिय महाधिवेशनमा प्रमुख अतिथिका रुपमा सम्वोधन गर्दै डा. कोइरालाले सो कुरा बताएका हुन् ।
मुलुकको अर्थतन्त्रमा ७० प्रतिशत कृषि उत्पादनले ओगटेको भएपनि त्यसलाई व्यवस्थित र व्यवसायिक बनाउन नसकेको समेत उनले बताए । नेपालको महत्वपूर्ण १७ लाख हेक्टर खेतीयोग्य भूमिले ओगटेको भएपनि सिंचाई सुविधा तथा कृषिमा काम गर्ने जनशक्ति अभावका कारण अहिले त्यस्ता उर्वर खेती योग्य भूमि बांझो रहिरहेको बताए ।
कृषि क्षेत्रको विकासले मात्र राष्ट्रियता बलियो बनाउने तर्क गर्दै उनले अस्थिरतालाई स्थिरता ल्याउन र गरिवी हटाउनका लागि कृषि क्षेत्र नै सवैभन्दा बलियो आधार रहेको समेत बताए । उनले नेपाली कांग्रेसको समाजवादी चिन्तन र विपीको सिद्धान्त कृषि क्षेत्र र किसानका लागि आवश्यक भएको उल्लेख गर्दै त्यसबेला कृषिमा २७ प्रतिशत बजेट छुट्याएकै कारण मुलुक कृषि प्रधानदेशमा रुपमा चिनिन सफल भएको बताए । अहिले कृषि क्षेत्रको विकासका चर्का कुरा गर्नेहरुले सरकारको नेतृत्व गर्दा ५÷७ प्रतिशत भन्दा बढी बजेट ल्याउन नसक्नु दुर्भाग्य भएको समेत बताए ।
मुलुक संघीयता तर्फ उन्मूख भईरहेका बेला कृषि विकास र पशु विकालाई प्राथमिकताका साथ सञ्चालन ल्याउनु पर्ने र त्यसका लागि अहिलेदेखि नै योजनावद्ध ढंगले अगाडि बढ्नु पर्ने भएकोले सम्वधित सरोकारवाला निकायहरुले प्रतिवद्ध भएर हिड्नु पर्ने समेत खुलासा गरे ।
देशको विकास गर्नका लागि र मुलुकलाई आत्मनिर्भरता तर्फ लैजानका लागि यो पार्टी वा त्यो पार्टीभन्दा पनि राष्ट्रवादी सोचले अगाडि बढ्नु पर्नेमा समेत उनले जोड दिएका थिए । राजनीतिक अस्थिरताका कारण युवा पुस्ता पलाय भईरहेको प्रसंग कोट्याउंदै कोइरालाले स्वदेशमा नै रोजगारको अवस्था सृजना गरी कृषिमा लगानी गर्ने वातावरण र त्यसको सुरक्षाको जिम्मेवारी सरकारले लिनु पर्ने किसिमले अगाडि बढ्ने हो भने कृषिले नै मुलुकको आर्थिक समृद्धि ल्याउने बताए ।
विपीका पालाका कृषिको बजेट २७ प्रतिशत !
Add Comment