कृषक बङ्गुरपालन व्यवसायप्रति आकर्षित

खोटाङ, ११ असोज । जिल्लाका कृषक बङ्गुरपालन व्यवसायप्रति आकर्षित भएका छन् । जिल्लामा उत्पादित बङ्गुर बाहिरी जिल्लामा निकासी हुन थालेपछि कृषक बङ्गुरपालन व्यवसायप्रति आकर्षित भएका हुन् । तराईसँगको सिधा यातायात सम्पर्क भएलगत्तै जिल्लामा आधिकारिक रुपमा फार्म दर्ता गरेर १८ जनाले बङ्गुरपालन सुरु गरेका छन् । बङ्गुरको मासु सदरमुकाम दिक्तेलमा प्रतिकिलो रु २५० मा बिक्री हुने गरेको छ । गत चैतमा सम्पन्न खोटाङको २२औँ जिल्ला परिषद्ले बङ्गुरपालन व्यवसायलाई प्राथमिकता दिनुपर्ने निर्णय पारित गरेको छ । बङ्गुरका लागि जिल्लाको हावापानी अनुकूल भएको पाइएपछि परिषद्ले बङ्गुरपालन व्यवसायलाई प्राथमिकता दिनुपर्ने निर्णय गरेको हो ।