जिल्ला कृषि कार्यालय विस्थापित भएपछि के भन्छन् प्रमुखहरु

के हो भन्ने आफैलाई थाहा छैन

दीपक शर्मा
प्रमुख
जिल्ला कृषि विकास कार्यालय दाङ्ग

कार्यालय स्थानीय तहमा गाभिने सर्कुलर भएको भएपनि कर्मचारीहरुको अवस्था के हुने भन्ने आफैलाई थाहा छैन । नयाँ संरचना अनुरुप स्थानीय तहमा जिल्ला कृषि कार्यालयलाई पनि गाभिएपछि अहिले अन्यौलता छाएको छ । हुन त प्राविधिक रुपाम सहयोग गर्ने काममा हामी लागि नै रहेका छौं तर संगठन संरचना नै अस्तव्यस्त भएका कारण के गर्ने के नगर्ने भन्ने समस्या रहेको छ । शुरुवातको समय भएकाले पनि यस्तो अन्योलता हुनु स्वाभाविक नै हो । केही समय पछि निक्र्यौल त होला । संघ र प्रदेशमा पनि मन्त्रालय भएकाले के गर्ने भन्ने स्पष्ट निर्देशन नआएकाले अहिले संयोजनकारी भूमिकामा छौं । अरु जिम्मेवारी तोकिएको छैन ।

लामो समयसम्म अन्यौलमा राख्नु हुँदैन

श्रीराम घिमिरे
प्रमुख
जिल्ला कृषि विकास कार्यालय, जाजरकोट
जिल्ला कृषि कार्यालय हटेपनि सो ठाउँमा ज्ञान केन्द्र रहेन निर्णय भएको छ । अरु कुनै पनि परिपत्र भएको छैन । विगतमा जिल्लाको प्रमुखको हैसियतमा काम गरेपनि अवको भूमिका के हो भन्ने थाहा छैन । बजेट कसरी सञ्चालन हुने, कसरी आउँछ वा कार्यक्रम कसरी अगाडि बढ्ने भन्ने कुरा पनि जानकारी छैन जसले गर्दा म मात्र होइन सवै जिल्लाका साथीहरु अन्योलमा हुनुहुन्छ । केही समयका लागि अन्यौलतामा छाउने छ त्यसमा अन्यथा लिनु पनि हुँदैन । तर लामो समयसम्म यसलाई राखिरहनु भने हुँदैन । सम्पूर्ण अधिकार स्थानीय तहमा दिएको भएपनि जिल्ला कृषि कार्यालय विस्थापित भए पश्चात बनेको कृषि ज्ञान केन्द्रलाई प्रदेश मातहतमा रहने भन्ने सुन्नमा आएको छ । केही समय पश्चात निकास आउला भन्ने आशा गरौं ।

प्रत्यक्ष मारमा किसानहरु परेका छन्

टपेन्द्र बहादुर शाह
प्रमुख
जिल्ला कृषि विकास कार्यालय, डोटी
जिल्ला कृषि विकास कार्यालय त खारेज भई नै सक्यो । डोटी जिल्लाका हकमा भने ज्ञान केन्द्र पनि नभएकोले थप निराशा बनाएको छ । कृषि क्षेत्रको लामो इतिहास डोटीमा समाप्त नै भएको छ । कृषि क्षेत्रको अस्तित्व समाप्त भएको धेरैले महशुस गरेका पनि छन् । त्यसको प्रत्यक्ष मारमा किसानहरु परेका छन् । कर्मचारीहरुलाई त सरकारले केही न केही व्यवस्था गरिनै हाल्छ । हिजो जुन रुपमा किसानहरुले प्रत्यक्ष रुपमा समस्या समाधान गर्न पाउनु भएको थियो त्यो अव सम्भावना देखिएको छैन । हामीले कार्यालय समेत सुम्पिसकेका छौं तर पनि स्थानीय तहमा जे संरचना बनाएको छ त्यसलाई मार्गदर्शन गर्ने काम बाहेक अरु खासै भूमिका भने छैन । साविकको जिल्ला कार्यालय नभए पनि हामीले स्थानीय तहमा जानु भएका साथीहरुलाई समन्वय गर्ने काम गर्दै आईरहका छौं । डडेल्धुरामा रहेको ज्ञान केन्द्रको सम्पर्क कार्यालयका रुपमा डोटीमा सञ्चालन हुन्छ कि भन्ने झिनो आशा छ ।

प्रत्यक्ष मारमा किसानहरु परेका छन्

यज्ञराज जोशी
प्रमुख
जिल्ला कृषि विकास कार्यालय, कैलाली
माथिल्लो निकायबाट जे भएको छ । त्यो रामै्र कामका लागि भएको होला भन्ने हो तर जिल्ला कृषि विकास कार्यालय पनि नभएको अवस्था र कृषि ज्ञान केन्द्र पनि नभएको अवस्थाल गर्दा विगतका वर्षहरु जस्तै उत्पादकत्व बृद्धि हुने कुरा शंकामा छ । यसले कृषि उत्पाद बृद्धि गर्ने कुरामा समस्या ल्याउँछ । एकातिर उत्पादन घट्ने प्रवल सम्भावना छ । अर्कोतिर सरकारले कृषिको आधुनिकीकरणको कुरा गरेको भएपनि प्रविधि विस्तारमा समस्या आउँछ । जुन रुपमा प्रविधि विस्तार हुनु पर्ने हो त्यो हुन सक्दैन । कृषि क्षेत्रको विकास भाषणमा होइन व्यवहारमा उतार्नु पर्दछ । त्यो अहिले देखिएन । सरकारले ज्ञान केन्द्र स्थापना गर्ने भनिएको छ जुन कञ्चनपुरको सट्टा कैलालीमा रह्यो भने प्रवाकारी हुन्छ । किनभने यस जिल्लामा ४० प्रतिशत भूभाग पहाडी क्षेत्र पनि ओगटेको छ । अर्को समस्या भनेको जनशक्ति अभाव छ । जिल्ला कृषि कार्यालय, सेवा केन्द्र रहँदा नै जनशक्ति अभाव थियो भने अव झन् समस्या हुने देखिन्छ । त्यसकारण कृषिको प्राविधिक जनशक्ति थप गर्दै जाने हो भने कृषिमा केही होला नत्र भन्न सकिँदैन ।